वाचनसाखळी समूह महाराष्ट्र राज्य
पुस्तक परिचयकर्ता- सौ अंजली शशिकांत गोडसे शिर्के मर्ढे सातारा
पुस्तक परिचय क्रमांक- ७०
पुस्तकाचे नाव - सत्तरीत सातारकर
लेखकाचे नाव - संपादक मधू नेने
प्रकाशन व आवृत्ती- कौशिक प्रकाशन सातारा प्रथम आवृत्ती
पृष्ठे संख्या– १५४
किंमत /स्वागत मूल्य-- ₹ १४४
📖✒️📚📚📚📚📚📚📚📚📚
७०||पुस्तक परिचय
सत्तरीचा सातारकर
संपादक मधू नेने
सुगड संगीत गुणग्राही । अनापेक्षी लोकसंग्रही । आर्जव सरत्य सर्वहि । प्राणीमात्रासी ।।
मित्रपणें परहितकारी । वाग्माधुर्ये परशोकहारी । सामर्थ्यपणें वेत्रधारी । पुरुषार्थे जगमित्र ।।
समर्थ रामदास
आदरणीय अरुण गोडबोले यांना समर्थ रामदासांनी लिहिलेल्या या ओळी तंतोतंत जुळतात . यामुळेच या ओळी या पुस्तकाच्या मुखपृष्ठावर दिलेल्या आहेत. माझा ७१ वा पुस्तक परिचय आणि सत्तरीचा सातारकर योगायोगाने हे पुस्तक माझ्या हातात पडलं आणि झपाट्याने त्याचे वाचन करून थोडक्यात त्याचा परिचय तुम्हा सर्वांसमोर आणण्यासाठी मला खूप आनंद झाला आहे.
अरुण गोडबोले हे साताऱ्याचे एक बहुआयामी व्यक्तिमत्त्व असून त्यांनी करसल्लागार, लेखक, चित्रपट निर्माता, सामाजिक कार्यकर्ते आणि सांस्कृतिक क्षेत्रात महत्त्वपूर्ण योगदान दिले आहे.
अरुण गोडबोले यांचा जन्म २ जुलै १९४४ रोजी साताऱ्यात झाला. त्यांचे वडील रा. ना. (बन्याबापू) गोडबोले हे नामांकित करसल्लागार आणि सामाजिक कार्यकर्ते होते. अरुणजींनी न्यू इंग्लिश स्कूल, सातारा येथून शिक्षण घेतले आणि नंतर पुण्यातील बी. एम. सी. सी. महाविद्यालयातून वाणिज्य शाखेत बी.कॉम. आणि एम.कॉम. पदव्या प्राप्त केल्या. त्यानंतर त्यांनी ILS लॉ कॉलेजमधून एलएल.बी. पदवी मिळवली आणि पुणे विद्यापीठात दुसरे येऊन डी. एल. वैद्य सुवर्ण पदक प्राप्त केले.
करसल्लागार म्हणून त्यांनी आपल्या वडिलांचा व्यवसाय पुढे चालवला. त्यांनी व्यवसायाच्या सुरुवातीला ट्रक व्यवसायही केला होता. तसेच, त्यांनी कौशिक प्रकाशन या संस्थेच्या माध्यमातून पाच मराठी आणि एक हिंदी चित्रपटांची निर्मिती केली. त्यांच्या चित्रपटांमध्ये 'कशासाठी प्रेमासाठी', 'नशीबवान', 'धुमाकूळ', 'बंडलबाज', 'राम रहीम' आणि 'हम दो बंडलबाज' यांचा समावेश आहे .
अरुण गोडबोले यांनी 'सातारा: स्मरणयात्रा' हे पुस्तक लिहिले आहे, ज्यात त्यांनी सातारा जिल्ह्याच्या इतिहासाचा आणि आपल्या कुटुंबाच्या साताऱ्यातील स्थायिकतेचा आढावा घेतला आहे . तसेच, 'इन्कम टॅक्सच्या नवल नगरीत' या पुस्तकात त्यांनी आपल्या ५७ वर्षांच्या करसल्लागार कारकिर्दीतील अनुभव कथन केले आहे .
त्यांनी आपल्या वडिलांच्या नावाने स्थापन केलेल्या 'रा. ना. गोडबोले सार्वजनिक ट्रस्ट'च्या माध्यमातून सामाजिक कार्य केले आहे. या ट्रस्टने १९७१ पासून ६,००० हून अधिक गरजू विद्यार्थ्यांना शैक्षणिक मदत दिली आहे. तसेच, त्यांनी अंत्यसंस्कार सहाय्यक मंडळाच्या माध्यमातून विनाशुल्क अंत्यसंस्कार सेवा सुरू केली आहे .
अरुण गोडबोले यांच्या पत्नी अनुपमा गोडबोले यांनी 'घरचा आहेर' हे पुस्तक लिहिले आहे, ज्यात त्यांनी आपल्या वैवाहिक जीवनातील अनुभव कथन केले आहेत. त्यांचा मुलगा उदयन गोडबोले करसल्लागार आहे, तर मुलगी डॉ. गौरी अरुण गोडबोले ही कराड येथे वैद्यकीय व्यवसाय करते .
अरुण गोडबोले यांचे जीवन हे विविध क्षेत्रातील कार्याचा उत्तम समन्वय आहे. त्यांचे कार्य प्रेरणादायी असून, त्यांनी साताऱ्याच्या सामाजिक, सांस्कृतिक आणि व्यावसायिक जीवनात महत्त्वपूर्ण योगदान दिले आहे.
"सत्तरीचा सातारकर" हे अरुण गोडबोले यांच्या सत्तरीच्या वाढदिवसानिमित्त प्रकाशित केलेले अभिष्टचिंतन ग्रंथ आहे. या ग्रंथाचे संकलन मधु नेने यांनी केले असून, नंदकिशोर नावंधर, सातारा यांनी प्रकाशित केले आहे.
या ग्रंथात विविध लेखकांनी अरुण गोडबोले यांच्या जीवनप्रवास, कार्य, विचारसरणी आणि सामाजिक योगदानावर आधारित लेख लिहिले आहेत. हे लेख त्यांच्या व्यक्तिमत्त्वाच्या विविध पैलूंना उजाळा देतात, ज्यात त्यांचे साहित्यिक योगदान, सामाजिक कार्य, आणि वैचारिक भूमिका यांचा समावेश आहे.एकूण 47 जणांनी या पुस्तकात आदरणीय अरुण गोडबोले यांच्या विषयी हृदयपूर्वक कथन केले आहे .अरुण गोडबोले यांना सर्वजण आवडीने काका म्हणताना दिसतात .शेवटच्या पानावर आदरणीय अरुण गोडबोले आपले स्वतःचे कृतज्ञ मी या शीर्षकाखाली मनोगत व्यक्त करतात आणि सर्वांची ऋण व्यक्त करतात .आपल्या मनोगतात शेवटी ते म्हणतात,
जिथे आहे जसा आहे । त्यात मी तृप्त आहे ।
नाही त्याची खंत नाही । आहे त्यात संतुष्ट आहे ।।
काही मागण्याची इच्छा नसावी । हेच एक मागणे आहे ।
देवाजीने नेहमीप्रमाणे । ते पुरवावे ही प्रार्थना आहे ।।
ग्रंथाच्या स्वरूपामुळे, तो केवळ एक चरित्रग्रंथ न राहता, अरुण गोडबोले यांच्या जीवनातील प्रेरणादायी क्षणांचे आणि त्यांच्या कार्याची सखोल समज प्रदान करणारे दस्तावेज आहे. या ग्रंथाच्या माध्यमातून वाचकांना त्यांच्या विचारसरणीचा आणि कार्यपद्धतीचा व्यापक आढावा मिळतो.
अरुण गोडबोले म्हणजे सातारा जिल्ह्याचे भूषण आहेत. नक्कीच सर्वांनी वाचावा त्यांची माहिती घ्यावी असा हा अभिष्टचिंतन ग्रंथ आहे. मला हा ग्रंथ एका कार्यक्रमात भेट म्हणून मिळाला हे माझे भाग्यच !त्यामुळे मला या थोर व्यक्तींच्या कार्याचा वटवृक्ष पाहता आला आणि वाचता आला. तुम्हीही नक्कीच हे पुस्तक वाचा .धन्यवाद.
☘️🍂☘️🍂☘️🍂☘️🍂🌾🎋🌾
सौ . अंजली शशिकांत गोडसे (शिर्के )
मु.पो मर्ढे ता . जि सातारा
No comments:
Post a Comment