कवयित्री
कान आणि डोळे यांच्यामध्ये असणाऱ्या
अंतराची जी करते खात्री
तिलाच म्हणावे कवयित्री
कल्पनेच्या विश्वात रमणारी
आकाशगंगेलाही पृथ्वीवर
अवतरण्यास लावणारी
तिलाच म्हणावे कवयित्री
कधी इथे तर कधी तिथे हुंदडणारी
प्रत्येकाचे भावविश्व ओळखणारी
तिलाच म्हणावे कवयित्री
स्वप्नातलं सारं सत्यात उतरवणारी
सत्य सारं अलगद मांडणारी
तिलाच म्हणावे कवयित्री
उच्च-नीच जातभेद न मानणारी
तुटक्या फुटक्या वाड्यातही सौंदर्य पाहाणारी
तिलाच म्हणावे कवयित्री
ताल, सूर, लयबद्धता टिपणारी
दगडालाही देवत्व आणणारी
तिलाच म्हणावे कवयित्री
शब्दांचे सामर्थ्य लीलया पेलणारी
लेखनशैलीतून स्वतःचं वेगळेपण जपणारी
तिलाच म्हणावे कवयित्री
प्रतिभेचा अमृत कलश पिणारी
कवितेसाठीच जीवन समर्पित
करणारी
तिलाच म्हणावे कवयित्री
✒️📖
सौ अंजली शशिकांत गोडसे शिर्के
मर्ढे सातारा
No comments:
Post a Comment